Mic少：赤道畿內亞搶W送鄉親

揭幕戰和波谷住道氣
話咁快非國盃今晚展開第二輪分組賽，頭場由A組主辦國赤道畿內亞出戰布基納法索，赤道畿內亞喺揭幕戰表現唔錯，可惜臨完場前被剛果逼和1比1，的確唔抵。不過咁反而會更加刺激主隊求勝決心，要喺國民面前威番次。布基納法索踢落冇厘神氣，阻唔到赤道畿內亞開齋，要主勝。

（周四凌晨零時開賽）

布基納法索遊埠心態
赤道畿內亞雖然靠後補接辦非國盃，先至入到決賽周，但上仗對剛果表現有板有眼，効力英冠米杜士堡嘅翼鋒尼素爾更迅速為球隊打開紀錄。加埋曾効力皇馬嘅前鋒巴保亞，其實赤軍中前人腳質素唔錯。不過球員可能喺揭幕戰有些少緊張，踢得唔夠放，未能入多1粒「燕梳球」，唔好彩臨尾被逼和。汲取教訓之後，相信赤道畿內亞今仗會更加進取壓逼對手，否則再失分，就會大大削弱出線機會，好難向國民交代。

布基納法索上仗吞加蓬兩蛋，前鋒球員把握力甚差，尤其係上半場表現極為鬆散，反映呢班波純粹「到此一遊」，根本無心爭標。布基納法索依家輸壞咗個頭，進一步打擊士氣，今場更加要唔落。

同組另一場加蓬鬥剛果，加蓬首仗旗開得勝，効力多蒙特嘅星級前鋒奧巴美揚都有波入，佢更豪言要再爭取「士哥」，今場都係睇佢表演，剛果上仗能夠逼和赤道畿內亞純屬夠運，佢哋實力麻麻，今場加蓬可秤先。

（周四凌晨3時開賽）