今晚白禮頓主場迎戰曼聯，兩軍首場同樣旗開得勝，「海鷗」今季首次主場出擊，自然想乘勝追擊，「紅魔鬼」難言穩勝。 白禮頓上場憑三笘薰先開紀錄，加下韋碧克及西蒙艾丁拿下半場建功，多踢一人下輕取愛華頓，新任少帥靴斯拿登陸英超有個好開始，3位傷兵艾雲費格遜、蘭普堤及佩華斯艾斯度比倫已經復操，加上新兵佐真尼奧魯達亦對辦，「海鷗」戰鬥力唔講得笑，連同季前熱身賽已經5連勝，今晚主場對住曼聯，絕對有力一戰。 坦帥眼前問題多多 曼聯首輪面對富咸，全靠荷蘭新兵約舒亞舒克斯尾段建奇功，驚險全取3分。主帥坦哈格今夏簽入不少舊部，包括上場擔正嘅馬沙拉奥及後備入替嘅馬菲斯迪歷特，新兵冇錯夠質素，但磨合仲要時間，加上前鋒拉舒福特持續缺態，坦帥眼前問題都唔少，加上近4次對白禮頓只得1勝，想兩連勝恐怕失望而回。文:謝德謙