Willhappy：史迪拿上「德」枱面_星島日報

啱啱個禮拜喺前哨駅介紹咗好多德國新嘅前線球員，但係仲未介紹史特加一個幾好波嘅中場，連曼城都有傳聞想買佢返嚟做洛迪後備，佢就係史迪拿。

呢位拜仁嘅青訓，曾經加盟過賀芬咸，而家喺史特加搵食嘅史迪拿，呢一兩年開始站穩陣腳同埋冒起，佢嘅賣點絕對係中場嘅控制能力，今季Keep住喺德甲有9成傳球成功率以上，佢嘅跑動能力亦都唔算弱，會喺球場唔同嘅地方都會見到佢駁腳，傳球絕對係佢嘅看點。

已經連續兩次入選德國大國腳，大家可能被阿歷山大柏夫洛域或安特列治名字蓋過咗，但係佢嘅進步亦真係越嚟越大，歐聯對皇馬亦都見到佢同拍檔艾特簡卡拉沙帶嚟嘅活力同埋驚喜，經常可以見佢嘅傳球撕破對方防線，今季每90分鐘都可以創造到兩次機會，顯示出佢係一個有能力，擺得上枱面嘅球員。

史迪拿亦要繼續提升，先有望可以站穩德國大軍嘅正選名單，希望佢今季都可以續領史特加返前4。Willhappy