西乙：拉科穩健至上蓄細抗迪_東方日報

今晚有場西乙獨腳戲，卡斯迪隆主場迎戰拉科魯尼亞。曾經叱咤一時嘅拉科魯尼亞近年一度淪為「丙組仔」，今季升上西乙後，演出中規中矩，最緊要係保住乙組席位先，踢法難免傾向保守，近6場聯賽作客，有5次總入球開2球或以下；卡斯迪隆實力一般亦冇乜勝算，寧願博中位數2.5球嘅入球細。（周二凌晨3時30分開賽）文:Mic少

相信資深球迷都對拉科魯尼亞唔陌生，佢哋最輝煌時代一定係上年紀90年代，曾經擁有白必圖及李華度等巨星，1999/00年球季更壓過巴塞及皇馬等傳統勁旅，勇奪西甲冠軍成為一時佳話。可惜「花無百日紅」，拉科近10年長期積弱，2018年降落西乙後每況愈下，一度淪為丙組仔。

卡斯迪隆主場照守
好彩呢支昔日勁旅已經捱過最黑暗日子，重返西乙亦逐漸企穩陣腳，踏入2025年後，10場聯賽取得4勝4和2負，勝率睇落唔高，但對手想贏佢哋亦非易事，事關拉科有自知之明，每每採取保守戰術，頻頻有分落袋，雖然排名唔算高，但同樣冇乜護級壓力，證明策略相當成功，應會延續穩健風格。

至於卡斯迪隆都係今季至升上西乙，無論實力或排名都同拉科相當接近，早前曾有不俗演出，一度4戰取得3勝1和，但上場1比3不敵艾爾切，難免打窒道氣。睇番對賽往績，卡斯迪隆過去5次對拉科輸咗4次，明顯受制對手，即使有地利亦不宜高估，預料都係做好防守，避免重蹈覆轍，好大機會出現拉鋸戰，入球唔慌多。