英超：曼聯森林鬥帥一決高下_東方日報

曼聯主場迎戰諾定咸森林，賽前雙方只相差3分，森林排喺第7位，「紅魔鬼」就排第13位，相信一眾「魔迷」都唔多滿意目前成績，希望球隊可以喺主場全取3分。

對症下藥慎防死球攻勢
曼聯周中以0比2不敵阿仙奴，新帥艾摩廉吞下領軍以來首場敗仗，球隊兩個失波都係輸角球，相信今場會對症下藥，加強防守死球部署。艾摩廉領軍下成功激活前鋒拉舒福特、海倫及約舒亞舒克斯，三人齊齊交出表現，料今場會繼續委以重任。左閘勞基梳爾復出不久又再受傷，中堅約羅上場已經上演地標戰，相信有助艾摩廉調動後防兵源。

森林今季演出令人驚喜，長期佔據聯賽上半版，不過周中吞完曼城3蛋，主帥紐奴想重回勝軌都唔太容易，事關近年森林作客奧脫福都全敗而回。近期森林防守方面出現唔少漏洞，失球數字頗高，睇怕紐奴短時間難以針對性解決防守問題，加上今場作客關係，相信森林送上3分畀「紅魔鬼」機會甚高。文:謝德謙