阿甲：守強攻弱穩中求勝 沙士菲細鍊圖庫曼_東方日報

周二朝早阿甲賽事，圖庫曼體育會主場迎戰沙士菲。沙士菲貴為上季阿甲盟主，但今季表現極速滑落，9場聯賽只係贏得1場，雖然換帥後稍有起色，但球隊今季攻弱守強，今仗作客都係以穩為先，唔好期望演出有太大改變，1.5/2球入球細博得過。（HOY 76台 周二早上8時13分直播）文:工廠仔

沙士菲今季表現奇差，由堂堂聯賽冠軍變成地底泥，教練杜明基斯上任3個月就被炒魷，上輪由看守教練巴禾帶隊，終於喺主場贏番場1比0。呢場唔單止係沙士菲今季首勝，亦係球隊今季聯賽第1個入波，總算打破開季連續720分鐘冇入波嘅頹勢。

主隊3連敗僅入1球
沙士菲依家係隻受傷嘅老虎，球員信心被摧殘後冇咁快可以恢復，今場就算對住狀態低迷，遭逢3連敗兼僅入1球嘅圖庫曼體育會，亦唔敢托大，相信仍會採取穩中求勝嘅策略。事實上，沙士菲入球能力薄弱，但至少防守唔差，近9場賽事8次總入球開2球或以下，對上4場更有3場開1球或以下，進取啲玩中位數1.5/2球嘅入球細都唔過分。