曼聯主場將“士”用命

曼聯主場將“士”用命

今日推介之前首先向車路士一班球員敬禮，因為佢哋嘅比賽精神與毅力的確令“車迷”佩服，近期賽事真係未停過，而且場場都要認真作戰，完全冇得鬆懈，打完巴素利後，今晚又要作客對曼聯，跟住打熱刺及維拉，四場波十日內“完工”，再抖幾日仲要踢歐霸盃決賽，呢班“藍戰士”仲辛苦過海豹陸戰隊打伊拉克，唔致敬點得。

講返今晚場推介曼聯對車路士，雖然曼聯已經完成大業，十三次成為英超之王，但上場對阿仙奴並冇放軟手腳，依然排出強陣與兵工廠抗衡，雲佩斯、朗尼、卡域克及艾華等主力悉數上陣，可見“費爵爺”要威到盡，奪標並非浪得虛名，特別今仗在奧脫福出戰，點會棄械投降，何況“敵對派”，必會全力撲擊對手，一報足總盃被淘汰之仇。

“車仔”要繼續保住“老三”位置，一定要全力搶分，今季四次惡鬥曼聯都殺得比較激烈，證明兩隊勢均力敵，唯一擔心連場激戰，體能上唔多唔少受到一定影響，能搶一分算係功成身退，初盤曼聯讓平手／半球，捧“紅魔”可以翻“車”。推介：曼聯2：1