意甲：水鬥水！威尼斯維羅納捱細界_東方日報

今晚意甲上演護級大戰，威尼斯主場鬥維羅納。兩隊目前同樣身陷降班區域，想逃出生天今場不容有失。威尼斯近況稍有起色，最大原因係防守表現有所改善，主場對住鋒力疲弱嘅維羅納，似乎大家都冇太多入球板斧，海軍鬥水兵下，一於博2.5球入球細。（周二凌晨1時30分開賽）

為護級必踢得保守
威尼斯依家排喺聯賽尾2，護級可謂水深火熱，不過佢哋最近逐漸上力，對上7場聯賽只係輸過2場，而且仲係以0比1僅負兩大勁旅拿玻里同國際米蘭，叫有交代。賽前有傳威尼斯首席射手普贊柏路可能轉會巴勒莫，今場未必會上陣，威尼斯想入波就更加困難，佢哋近4場賽事總入球全開2球或以下，今仗會繼續防守行先。

維羅納領先威尼斯4分暫排尾3，形勢未至於太悲觀，佢哋最大問題係近期唔識入波，近5場聯賽有4場「食白果」，今場仲有中場杜達同後衞達維杜域斯要停賽，作客難免踢得穩陣啲。加上威尼斯教練迪法蘭斯高同維羅納教頭保羅辛尼迪，都曾經執教過對面球隊，知己知彼下唔會輕易曝露弱點，入球細屬好路之選。