歐聯附：遇強照攻些路迪大無畏_東方日報

今晚歐聯附加賽首回合，些路迪主場鬥拜仁慕尼黑。些路迪整體實力唔及對手，但為求晉級，主場都要豁出去博一博，否則次回合作客更難踢。呢支蘇超班霸近4次歐聯對德甲球隊，3次總入球開4球或以上，首選中位數3.5球嘅入球大。（Now 643周四凌晨4時直播）

失威踢附加賽拜仁要交代
些路迪今屆歐聯夠晒娛樂性，曾以1比7慘敗於多蒙特腳下，但亦能贏另1支德甲代表RB萊比錫3比1，作客英超嘅阿士東維拉則以2比4落敗，可見佢哋即使遇上4大聯賽勁旅，唔會刻意死守，甚至無懼同對手鬥攻。事實上些路迪可以躋身附加賽，叫做超額完成，球員冇心理包袱下，隨時踢得更放。

至於拜仁未能以前8位直入16強，已經顏面掃地，急需一場漂亮勝仗省番靚個招牌。呢支德甲1哥攻力唔使懷疑，前鋒哈利卡尼今季上陣28場狂入28球，單計歐聯都有6球進帳，加上穆斯亞拿及米高奧利斯等亦有數胡能力，要撕破些路迪防線易如反掌，雙方有望合演入球騷娛樂球迷。