曼城上“韋”捧盃

曼城上“韋”捧盃

今季英超三大勁旅，曼聯、曼城及“車仔”都一人有一個夢想，曼聯重奪聯賽錦標已夢想成真，車仔誓要捧走歐霸盃，曼城目標就係今晚所爭嘅足總盃。對手只係護級勢危的韋根，實力明顯與曼城有較大差距，只要發揮正常水準，“文蛇”今季應可攞個安慰奬。

韋根在聯賽已經命懸一線，下一場仲要作客對亟需搶分的阿仙奴，睇怕打定輸數等降班，如今只望能夠死得眼閉，博爆冷擊敗曼城捧個足總盃，可以含笑落英冠，但機會率有幾大？大家心照！

初盤曼城硬讓球半，決賽大場面對住小球會，曼城一衆球星都比較淡定，一於捧曼城贏波贏盤，“開嚟攤開二”。

上月中兩隊曾經在聯賽碰頭，數據上大家勢均力敵，曼城最終只能一球小勝。不過，曼城當時稍有留力，今晚決賽爭勝決心肯定唔同，球隊核心D施華養精蓄銳，配合阿根廷孖寶迪維斯與阿古路，必令韋根防線疲於奔命。

穩守突擊係韋根唯一部署，但守唔守得穩、突唔突擊得起，又係一個問題。只望盡最大努力，博一博，單車變摩托。

推介：曼城2:0