外圍賽：實力超兩班 威爾斯速搶半W_東方日報

世盃外歐洲區J組搶分戰，威爾斯主場迎戰哈薩克。威爾斯喺J組實力僅次於比利時，如果發揮得好，有機會同「歐洲紅魔」爭奪首名出線資格，所以佢哋對住同組其他對手唔可以失分。哈薩克實力只屬歐洲三線，威爾斯贏波唔難，不過主勝太熱唔想揀，既然佢哋近5場4次半場領先，而且心急贏波，半場主勝都算穩陣。（周日凌晨3時45分開賽）文:邪神

自從加里夫巴利掛靴，「紅龍」失去該位超級巨星坐鎮，確實有一段調整期，上屆歐國聯由A級降落B級，上屆歐國外更未能出線，不過近期已經完成接班，去年夏天接掌教鞭嘅比拿美帶領下，球隊成績亦有所回升，喺歐國聯B4組6戰3勝3和，以小組首名取得升班資格。

威爾斯今次點兵，同去年11月主場大炒冰島4比1有7個變動，隊長艾朗藍斯同進攻主力哈利威爾遜都未有入選，闊別國家隊4年嘅湯馬士羅倫斯則獲重召，不過入球重責主要係睇熱刺新進前鋒比蘭莊臣同列斯聯箭頭丹尼爾占士嘅表現如何。

魚腩哈薩克輸到慌
用歐國聯成績做參照對象，哈薩克在今屆歐國聯同樣喺B級聯賽，但喺B3組6戰1和5負包尾降班，6場0入球失15球，呢支歐洲三線球隊對住威爾斯呢支準A級球隊，輸波屬意料中事，預料佢哋半場都守唔住，半場主勝放心捧場。