歐國聯：鐵桶唔易破葡軍半細埋丹_東方日報

歐國聯8強次回合賽事，葡萄牙主場迎戰丹麥，首回合葡萄牙以0比1落後，今仗返主場非勝不可，不過葡軍上場表現差勁，繼續靠40歲老將C朗拿度單天保至尊唔係長遠辦法。丹麥今場肯定擺鐵桶，葡萄牙想入波唔係咁容易，開1.5球半場細機會高。（周一凌晨3時45分開賽）文:工廠仔

葡萄牙人才濟濟，不過前鋒位置未有人可以接班C朗，呢位老將首回合踢足90分鐘被凍結，只係隔3日就踢次回合，C朗體能應唔應付到令人懷疑。葡萄牙近4場比賽有2場「交白卷」，顯示出佢哋進攻出現問題，丹麥領先下可以大安旨意死守，葡萄牙一時三刻未必搵到破關之法。

丹麥好氣好力頂到半場
丹麥向來以效率見稱，踢法機動同體力化，就連前鋒海倫都會落力返後面幫助防守，上半場精力充沛情況下，可以有效壓制對手組織。睇番兩隊近3次對賽，全部都係鬥到下半場先至1球定勝負，近5次交鋒有4次半場總入球開1球或以下，今仗相信早段都係拉鋸戰，博1.5球半場細好路。